झरे पंचक्रोशी जनता विद्यालयात भारतरत्न डॉ. बाबासाहेब आंबेडकर यांची जयंती उत्साहात साजरी.

 झरे पंचक्रोशी जनता विद्यालयात भारतरत्न डॉ. बाबासाहेब आंबेडकर यांची जयंती उत्साहात साजरी.

झरे / प्रतिनिधी

भारतीय राज्य घटनेचे शिल्पकार, महामानव, भारतरत्न डॉ. बाबासाहेब आंबेडकर यांची 134 वी जयंती झरे पंचक्रोशी जनता विद्यालयात मोठ्या उत्साहात साजरी करण्यात आली. यावेळी डॉ. बाबासाहेब आंबेडकर यांच्या प्रतिमेला जागृती सामाजिक व शैक्षणिक विकास संस्था झरेचे संस्थापक अध्यक्ष प्रा. साहेबराव चवरे सर ,उपाध्यक्ष भालचंद्र मेटकरी साहेब ,सचिव भीमाशंकर स्वामी सर व मुख्याध्यापक देवानंद घोणते सर तसेच सर्व शिक्षक यांच्या हस्ते पुष्पहार अर्पण करून अभिवादन करण्यात आले. यावेळी विद्यालयातील सर्व शिक्षक व शिक्षकेत्तर कर्मचारी तसेच विद्यार्थी व विद्यार्थीनी उपस्थित होते.

यावेळी बोलताना प्रा. साहेबराव चवरे सर म्हणाले की, भारतीय संविधानाचे शिल्पकार भारतरत्न डॉ.बाबासाहेब आंबेडकर यांचा उदय म्हणजे उपेक्षित, तेजोहिन आणि सामाजिक चेहरा नसलेल्या समाजघटकांमध्ये मानवी हक्कांबद्दल जागृतता निर्माण करणाऱ्या क्रांतीसूर्याचे आगमनच होय. जाती-पातीच्या विषमतेवर आणि तथाकथित मनुवादी समाजव्यवस्थेत शेकडो वर्षे गुलामगिरीचे जीवन जगणाऱ्या दलित-पददलित लोकांना नवा सामाजिक चेहरा देण्याचं व त्यांना बोलकं करण्याचं ऐतिहासिक कार्य महानायक डॉ.बाबासाहेब आंबेडकर यांनी केलं. त्यातून तथाकथित समाजातली वर्णव्यवस्था व जातीभेदाचे समूळ उच्चाटन करत देशात सामाजिक समता प्रस्थापित केली. यावेळी विघ्नेश संतोष वाघमारे या विद्यार्थ्याने  मनोगत व्यक्त केले. या कार्यक्रमाचे सुत्रसंचालन संतोष वाघमारे सर यांनी केले.