झरे बँक दरोड्याचा थरार उघड! सांगली एलसीबीची मोठी कारवाई; ३.२५ कोटींचा मुद्देमाल जप्त, आंतरराज्य टोळी जेरबंद

 

झरे बँक दरोड्याचा थरार उघड! सांगली एलसीबीची मोठी कारवाई; ३.२५ कोटींचा मुद्देमाल जप्त, आंतरराज्य टोळी जेरबंद

सांगली (प्रतिनिधी):

 न्यूज प्रारंभ वृत्तसेवा 

आटपाडी तालुक्यातील झरे येथील जिल्हा मध्यवर्ती बँकेच्या शाखेत गॅस कटरने लॉकर कापून झालेल्या धाडसी चोरीचा छडा लावण्यात सांगली स्थानिक गुन्हे अन्वेषण शाखेला (LCB) मोठे यश आले आहे. या कारवाईत पोलिसांनी उत्तर प्रदेशातील मुख्य सूत्रधारासह स्थानिक साथीदारांना अटक केली असून, त्यांच्याकडून ३ कोटी २५ लाख ५४ हजार ६०० रुपये किमतीचा प्रचंड मुद्देमाल हस्तगत केला आहे.

नेमकी घटना काय?

७ जानेवारी २०२६ च्या सायंकाळी ५ ते ८ जानेवारीच्या सकाळी ९:४५ वाजण्याच्या दरम्यान, चोरट्यांनी झरे येथील जिल्हा मध्यवर्ती बँकेच्या खिडकीचे गज गॅस कटरने कापून आत प्रवेश केला होता. आरोपींनी बँकेतील २२ लॉकर तोडून ग्राहकांचे सोने-चांदीचे दागिने आणि रोख रक्कम लंपास केली होती. पुरावा नष्ट करण्यासाठी आरोपींनी बँकेचा सीसीटीव्ही डीव्हीआर (DVR) देखील सोबत नेला होता.

पोलिसांची तपासाची चक्रे आणि थरारक पाठलाग

या गुन्ह्याचे गांभीर्य ओळखून विशेष पोलीस महानिरीक्षक सुनील फुलारी आणि पोलीस अधीक्षक संदीप घुगे यांनी तपासाचे आदेश दिले होते. एलसीबीचे पोलीस निरीक्षक संजीव झाडे यांच्या मार्गदर्शनाखाली दोन पथके तयार करण्यात आली.

तपासादरम्यान गुप्त बातमीदाराकडून माहिती मिळाली की, पलूस येथील एका लॉजवर उत्तर प्रदेशातील काही व्यक्ती मुक्कासाला होत्या. तांत्रिक तपासाच्या आधारे पोलिसांना समजले की, मुख्य आरोपी राहुल शर्मा हा उत्तर प्रदेशात पळून गेला आहे. सपोनि पंकज पवार यांच्या पथकाने उत्तर प्रदेशातील ककराळा (बदायूं) येथे स्थानिक पोलिसांच्या मदतीने छापा टाकून राहुल शर्माला १९ जानेवारी रोजी शिताफीने ताब्यात घेतले.

दुसरीकडे, सपोनि जयदीप कळेकर यांच्या पथकाने सांगलीवाडी येथील फल्ले मंगल कार्यालय परिसरात सापळा लावून एका पांढऱ्या रंगाच्या स्कॉर्पिओला (DL 10 CK 9268) थांबवले. या गाडीची झडती घेतली असता, सीटखाली लपवलेले सोन्याचे दागिने, रोख रक्कम, एक गावठी कट्टा आणि ४ जिवंत काडतुसे मिळून आली.

अटक केलेले आरोपी:

१. राहुल रंजमीश शर्मा (वय २७, रा. उत्तर प्रदेश) - मुख्य सूत्रधार

२. विश्वजीत विजय पाटील (वय २४, रा. बांबवडे, सांगली) - स्थानिक मदतगार

३. संकेत अरुण जाधव (वय २६, रा. बलवडी, सांगली) - साहित्य पुरवणारा

४. इजाज राजू आत्तार (वय ३०, रा. आमनापूर, सांगली) - गुन्ह्यात सहभाग

जप्त केलेला मुद्देमाल:

 * सोने: १.१६८ किलो सोन्याच्या लगडी (किंमत १ कोटी ५७ लाख ६८ हजार रु.) आणि ५०३ ग्रॅम दागिने (७० लाख रु.).

 * चांदी: २८.५०० किलो चांदीचे दागिने, मूर्ती व वस्तू (८७ लाख रु.).

 * इतर: स्कॉर्पिओ गाडी (१० लाख रु.), रोख रक्कम (५१,६०० रु.) आणि गुन्ह्यात वापरलेला गॅस सिलेंडर व कट्टा.

एकूण जप्त किंमत: ३,२५,५४,६००/- रुपये

कारवाईतील पथक:

ही यशस्वी कारवाई पोलीस निरीक्षक संजीव झाडे, सपोनि पंकज पवार, सपोनि जयदीप कळेकर आणि त्यांच्या सहकाऱ्यांनी पूर्ण केली. पुढील तपासासाठी आरोपींना आटपाडी पोलीस ठाण्याकडे वर्ग करण्यात आले आहे.

पुढील पाऊल: या प्रकरणातील राहुल शर्माचे इतर फरार साथीदार कोण आहेत? त्यांच्या शोधासाठी पोलिसांचे पुढील तपास सत्र सुरू आहे. या प्रकरणातील अधिक अपडेट्ससाठी न्यूज प्रारंभशी संपर्कात राहा.